རྣམ་པ་སྣ་མང་ལྡན་པའི་འབའ་གཞས།

ཕུན་ཚོགས་བཀྲ་ཤིས།        2016-06-28

རྣམ་པ་སྣ་མང་ལྡན་པའི་འབའ་གཞས།

འབའ་བ་སྐྱིད་པའི་ཐོག་ལ།།
དབྱར་གྱི་སྟོན་ཐོག་གཉིས་བརྩེགས།།
དགོན་པ་ཆོས་ས་དར་བ།།
ནོར་བུ་མིན་ན་གང་ཡིན།།
ཞེས་པ་སོགས་འབའ་གཞས་རིམ་བཞིན་བོད་གངས་ཅན་ཡོངས་ལ་ཁྱབ་གདལ་གཏིང་ཟབ་ཏུ་སོང་བར་མ་ཟད།འཛམ་བུ་གླིང་དུའང་སྐད་གྲགས་ཡོད་ཅིང་།ལོ་རྒྱུས་ཡུན་རིང་ལ་ནང་དོན་ཡང་ཕུན་སུམ་ཚོགས་པོ་ཡོད་པ་རེད།བཤད་སྲོལ་ལྟར་ན་འབའ་གཞས་ཀྱི་ལོ་རྒྱུས་ཧ་ལམ་ལོ་ངོ་སྟོང་ཕྲག་གཅིག་ལྷག་ཙམ་ལྡན་ཏེ།མཁས་དབང་ཁ་ཤས་ཀྱིས་ཞིབ་འཇུག་བྱས་པའི་འབྲས་བུར་གཞིགས་ན།འབའ་གཞས་དར་བའི་ལོ་རྒྱུས་དེ་མིང་རྒྱལ་རབས་དང་ཆིང་རྒྱལ་རབས་སྐབས་སུ་ཡོད་པའི་བཤད་སྲོལ་ཡོད་པ་དང་།གང་ལྟར་བཤད་སྲོལ་མི་འདྲ་བ་མང་པོ་ཡོད།འབའ་གཞས་ཀྱི་ལོ་རྒྱུས་ཡུན་རིང་ལྡན་པར་ཀུན་གྱིས་ཁས་ལེན་དང་ར་སྤྲོད་བྱས་ཡོད་པ་རེད།]

རྣམ་པ་སྣ་མང་ལྡན་པའི་འབའ་གཞས།

འབའ་གཞས་ཀྱི་ནང་དོན་ཕུན་སུམ་ཚོགས་ཤིང་ཁམས་བོད་མི་དམངས་ཀྱི་ཐོན་སྐྱེད་འཚོ་བ་དང་རིག་གནས་དཔལ་འབྱོར།ལོ་རྒྱུས་དང་ཡུལ་སྲོལ་གོམས་གཤིས།རང་བྱུང་ཁོར་ཡུག་དང་མི་རིགས་ཀྱི་འབྲེལ་བ་ལ་སོགས་པ་ཚུད་ཡོད་ཅིང་།གཞས་ཚིག་མང་ཤོས་ནི་མཛེས་པའི་ཕ་ཡུལ་གྱི་འབྱོར་ཕྱུག་དང་བདེ་སྐྱིད་ལ་བསྔགས་བརྗོད་བྱས་ཡོད་ལ།ད་དུང་གངས་རི་དང་རྩྭ་ཐང་།ཞིང་ཁའི་མཛེས་ལྗོངས།རང་བྱུང་གི་རི་ཀླུང་སོགས་ལ་སེམས་གཏིང་ནས་དགའ་ཞེན་ཡོད་པར་སྨོན་ལམ་དང་བསྟོད་པ་བྱས་ཡོད།དེས་མ་ཚད་འབའ་བའི་ཕོ་མོ་ཕན་ཚུན་དྲི་མེད་རྣམ་དག་གི་དགའ་སེམས་དང་མཛའ་བཤེས་སོགས་གླུ་གཞས་ཀྱི་སྟེང་ནས་བསྔགས་བརྗོད་གཏོང་གི་ཡོད་པ་རེད།དཔེར་ན།དཀར་གསལ་ཟླ་བ་གཞོན་ནུ།།མཛེས་བསམ་སྙམ་པ་མ་གནང་།།ཆུང་འདྲིལ་བྱམས་པའི་ཞལ་རས།།ཟླ་བ་ལས་ཀྱང་མཛེས་པ།།ཞེས་པ་ལྟ་བུ་དགའ་སེམས་མཚོན་པའི་གཞས་ཚིག་ཀྱང་ཡོད་པ་རེད།འབའ་གཞས་ཁྱབ་གདལ་ཕྱིན་པའི་ལོ་རྒྱུས་ཡུན་རིང་ཞིང་ཡུལ་དེ་གའི་མི་དམངས་རྣམས་ཀྱིས་བགྲང་བྱ་ཡུན་རིང་ཁྲོད་ཐོན་སྐྱེད་དང་འཚོ་བ་ལས་བརྩམས་པའི་བོད་མི་རིགས་ཀྱི་ཁྱད་ཆོས་ལྡན་པའི་གཞས་ཚིག་སྟོང་ཕྲག་དུ་མ་ཡོད་པ་དང་།དེ་ནི་ཕུན་སུམ་ཚོགས་པའི་རིག་གནས་རྩ་ཆེན་ཞིག་ཀྱང་ཡིན་པ་རེད། 

རྣམ་པ་སྣ་མང་ལྡན་པའི་འབའ་གཞས།

འབའ་གཞས་དར་བ་ནས་བཟུང་།འབའ་ཐང་མི་དམངས་ཀྱིས་རྒྱུན་ལྡན་འཚོ་བའི་ནང་རོལ་རྩེད་བྱེད་སྒོའི་ནང་དོན་གཙོ་བོ་བྱས་ནས་དགའ་འཛོམས་དང་།གཉེན་སྟོན་ཐོག་མེད་དུ་མི་རུང་བའི་རིག་རྩལ་ཞིག་ཡིན་ཞིང་།ཕོ་མོ་རྒན་གཞོན་རྣམས་འཚང་ཁའི་ངང་ནས་གཞས་འཁྲབ་པ།གཞས་ཚིག་ཀྱང་བྱེད་སྒོའི་ནང་དོན་ལ་བརྟེན་ནས་ཚིག་བཙུགས་ཏེ་གཞས་འཁྲབ་པ།དཔེར་ན།ཕ་ཡུལ་ལ་བསྟོད་པའི་གཞས་ལས།བཀྲ་ལ་ཤིས་པའི་གཞས་རེད།།གཡང་ལ་ཆགས་པའི་གཞས་རེད།།སྐྱིད་པོ་ཕ་ཡུལ་ལུང་པ།།འགྱུར་བ་མེད་པའི་གཞས་རེད།།ཞེས་པ་ལྟ་བུའོ།།ཕོ་མོ་ཕན་ཚུན་བར་གྱི་བརྩེ་དུང་མཚོན་པའི་གཞས་ཚིག་ལ།བདག་གི་ཆུང་འདྲིས་བྱམས་པ།།གཤིས་བཟང་རྣམ་ཤེས་དྭངས་པ།།གསུང་ཚིག་དར་ལས་འཇམ་པ།།སེམས་ཉིད་དུང་ལས་དཀར་བ།།ལྟ་བུའོ།།འབའ་ཐང་གི་གནའ་རབས་དང་དེང་རབས་ཀྱི་ལོ་རྒྱུས་རིག་གནས་ཕུན་སུམ་ཚོགས་པོ་ཡོད་ལ།དེས་མཚོན་པའི་གཞས་དེ་ཉིད་རྒྱུན་འཛིན་དང་དར་སྤེལ་བྱས་ནས་འབའ་གཞས་ནོར་བུ་དགོས་འདོད་ཀུན་འབྱུང་དེ་དབྱར་མཚོ་རྒྱས་པ་ལྟར་ཡར་རྒྱས་བཏང་ཡོད་ཅིང་།ཉེ་བའི་ལོ་ཤས་རིང་།འབའ་ཐང་རྫོང་གིས་ཤུགས་ཆེན་པོས་མི་ཤུགས་དང་རྒྱུ་ཤུགས་མང་པོ་བཏང་ནས་འབའ་གཞས་མྱུར་སྐྱོབ་བྱས་ཏེ།འབའ་གཞས་སྒྲ་ཕབ་དང་བརྙན་ཕབ།འབའ་བའི་གཞས་ཚིག་བསྡུ་རུབ་བཅས་ཀྱི་བྱ་བ་བྱས་ནས་འབའ་གཞས་ཀྱི་ཕ་ཡུལ་ཞེས་པ་གསར་སྐྲུན་བྱས་ཡོད་པ་དང་ཆབས་ཅིག རྒྱལ་ཁབ་རིག་གནས་པུའུ་ཡིས་ཀྲུང་གོའི་གཞས་བྲོའི་ཕ་ཡུལ་ཞེས་པའི་མཚན་སྙན་གནང་བ་རེད།འབའ་གཞས་དེ་རྒྱ་ཁྱབ་རབ་བཞིན་དང་མང་ཚོགས་རང་བཞིན་ལྡན་པའི་གཞས་བྲོ་ཡིན་གཤིས་འབའ་ཐང་མི་དམངས་ཀྱི་རྒྱུན་ལྡན་འཚོ་བའི་ནང་ལ་མེད་དུ་མི་རུང་བའི་རིག་གནས་འཚོ་བ་ཞིག་ཏུ་ཆགས་ཡོད་པ་དང་།སྔོན་མའི་རོལ་རྩེད་སྣ་གཅིག་གི་བྱེད་སྟངས་ཐོག་ནས་དེང་སང་བཟོ་ལྟ་སྣ་མང་ལྡན་པའི་རོལ་རྩེད་བྱེད་སྒོ་ཞིག་ཏུ་གྱུར་ཡོད།འབའ་གཞས་དེ་འབའ་ཐང་མི་དམངས་ཀྱི་སེམས་གཏིང་དུ་གོ་གནས་གལ་ཆེན་བཟུང་ཡོད་ཅིང་།ཉིན་རེ་ལས་ཉིན་རེར་དོ་སྣང་དང་མཐོང་ཆེན་བྱེད་ཀྱི་ཡོད་པ་རེད།།

  • ལེ་ཚན་སྔོན་མ།:བོད་ཀྱི་བྲོ་གླུ།
  • ལེ་ཚན་རྗེས་མ།:ཁམས་མི་ཉག་མགར་ཐར་ཡུལ་གྱི་གླུ་གར་སྒྱུ་རྩལ་གྱི་སྐོར་ཅུང་ཙམ་བཤད་པ།
  • རྩོམ་གསར། 10