སྣང་གསར་གྱི་ཐང་ག་ནི་ཐང་གའི་བཟོ་རྩལ་གྱི་འཕེལ་རིམ་མི་འདྲ་བའི་རིམ་པ་ཞིག་རེད།དེ་ཡང་སྲོལ་རྒྱུན་བཟོ་རྩལ་ལ་དགག་པ་མེད་ཅིང་།སྲོལ་རྒྱུན་བཟོ་རྩལ་གཞིར་བཞག་གི་ཐོག་ནས།སྣང་གསར་བཟོ་རྩལ་ཞིག་ཡོད་ཆོག་གི་འདུག་ལ།ཡོད་དགོས་པ་ཞིག་ཀྱང་རེད།སྲོལ་རྒྱུན་བཟོ་རྩལ་ལ་མོས་པ་དགའ་རབ་ཡོད་ཅིང་དེའི་ཕྱོགས་སུ་ནུས་པ་བཏོན་མཁན་ཡོད་ན་དེས་ཀྱང་འགྲིག་གི་འདུགདེང་རབས་ཀྱི་སྣང་གསར་བཟོ་རྩལ་མོས་པ་ཡོད་ཅིང་དེའི་ཕྱོགས་སུ་རྩལ་དུ་བཏོན་མཁན་ཡོད་ན་ཡང་འགྲིག་འདུགགང་ལྟར་བོད་ཀྱི་ཐང་ག་ཡིན་ན་ལྷ་དང་བླ་མ་ཁོ་ནས་འབྲི་བཞེང་བྱེད་ས་ཡིན་མི་དགོས་ལ།འབྲི་བཞེངས་དེ་ཡང་དཔེ་བཤུས་དང་།པར་ལེན་པ་ལྟ་བུའི་རིས་མལ་རིས་འགྲོ་དེ་ལས་ཀྱང་ཡིན་མི་དགོས།དཔེར་ན་སྔོན་རབས་ཀྱི་རི་མོ་པ་གྲགས་ཅན་ཀརྨ་སྐུ་ཕྲེང་བཅུ་བ་ཆོས་དབྱིངས་རྡོ་རྗེས་སྒྱུ་རྩལ་ཕུན་སུམ་ཚོགས་པ།ཁྱད་ཆོས་འབུར་དུ་ཐོན་པ།ལྟ་ན་མིག་ལ་མཛེས་པ།བསམ་ན་ཡིད་དབང་འཕྲོག་པ།དྲན་ན་རྟོགས་རླབས་འཕྱུར་ཐུབ་པའི་དགེ་མཚན་འདི་ཡང་།སྔོན་མེད་ཀྱི་ལྷ་རིས་སྒྱུ་རྩལ་གསར་པ་ཞིག་ཡིན་པ་ཡང་ཀུན་གྱིས་ཁས་ལེན་པ་བཞིན་ནོ།།
　　དེར་བརྟེན་གནའ་སྲོལ་དེའི་ར་བ་ལས་བརྒལ་མི་ཆོག་པ་མ་ཡིན་ཞིང་།དེའི་སྒོ་ལྕགས་བརྒྱབ་པ་ལྟ་བུ་མ་ཡིན་པར།སོར་གང་མཛུབ་གང་བཟོ་བཅོས་མི་ཆོག་ཅིང་རང་སོར་གནས་དགོས་ཟེར་བ་ལྟ་བུ་མ་ཡིན་པར།འཕེལ་རྒྱས་དང་དར་སྤེལ་ཡོང་དགོས་ཀྱི་ཡོད།དེར་བརྟེན་ད་ལམ་མིག་གི་དགའ་སྟོན་དུ་འགྱེད་པའི་སྣང་གསར་ཐང་ག་འདི་ནི་གསར་གཏོད་རང་ཡིན་ལ།འདི་འདྲའི་ཐང་ག་ཞིག་མིག་ལམ་དུ་གྱུར་མ་མྱོང་བ་ལྟ་བུ་ཞིག་ཆགས་ཡོད།དེར་བརྟེན་སྣང་གསར་ཐང་ག་གསར་གཏོད་མཛད་པའི་བློ་གྲོས་ཀྱི་བང་མཛོད་ལས་བླངས་པའི་དགོས་པ་དང་།དམིགས་ཡུལ།བྱེད་ལས་སོགས་ཅི་ནུས་ཤིག་ཟིན་བྲིས་སུ་བཏབ་པ་ལ།དེ་ཡང་ཐད་ཀར་ཇི་བཞིན་བརྗོད་པའི་རྩོམ་རྩལ་ཡང་ཡོད་ཆོགརང་བཞིན་དྲང་པོར་བརྗོད་པའི་སྙོམས་འབབ་ཀྱི་མཐའ་ཡས་རྒྱ་མཚོ་ཡོད་ཆོག་ལ།སྒྱུ་རྩལ་གྱི་འཆར་སྒོ་མ་འགག་པའི་རྒྱ་མཚོའི་རླབས་ཀྱི་ཟེགས་མ་མཁའ་ལ་འཕྱུར་བ་དེ་ཡང་ཡོད་ཆོགདེ་ལྟར་རྩོམ་རིག་ལ་རང་བཞིན་དྲང་བརྗོད་དང་།སྒྱུ་རྩལ་རྩོམ་རིག་གཉིས་ཡོད་ཆོག་པ་བཞིན་དུ།བཟོ་རྩལ་ལ་ཡང་རང་བཞིན་དྲང་འབྲི་དང་།སྣང་གསར་སྒྱུ་རྩལ་གྱི་རྟོགས་འབྲི་གཉིས་ཡོད་ཆོག་སྟེ།ཟླ་བ་ཟླ་བར་སྣང་བ་དང་།ཟླ་བ་མཛེས་མར་སྣང་བ་ཡོད་ཆོག་ལ།བླ་མ་བླ་མར་སྣང་བ་དང་།
བླ་མ་སངས་རྒྱས་སུ་སྣང་བ་ཡང་ཡོད་ཆོག་པ་བཞིན་ནོ།།སྤྱིར་རི་མོ་པ་ཞིག་གིས་བྲིས་པའི་རི་མོ་དེ་ཡང་།རྩོམ་རིག་ཅིག་ཡིན་ཞིང་།རི་མོ་པའི་བློ་གྲོས་སྒྱུ་རྩལ་གྱི་ཞིང་ཁམས་ནས་ཐོན་པའི་དགའ་སྐྱོ་སྐྱིད་སྡུག་གི་ཚོར་བ་སྣ་ཚོགས་པའི་རྟོག་རླབས་དེ་རི་མོའི་ལམ་ནས་བཞེངས་སྐྲུན་ཐུབ་ན།རི་མོ་དེ་ནི་སྲོག་གི་དབུགས་དབྱུང་ཐོབ་པའི་རི་མོ་ཞིག་ཡིན་ལ།ཚེ་བླ་སྲོག་གསུམ་འཛོམས་པའི་རི་མོ་གསོན་པོ་ཞིག་ཡིན།དེར་བརྟེན་རི་མོ་པའི་རྟོག་པའི་འཆར་སྒོ་ནས་ཐོན་པའི་སྒྱུ་རྩལ་གྱི་རྦ་རླབས་ཡོད་ཅིང་།སྒྱུ་རྩལ་དེས་མི་ཡི་རིགས་ལ་སྣང་ཚུལ་གསར་པ་དང་།བློ་སྟོབས་གསར་པ་ཞིག་སྦྱིན་ཐུབ་པར་མ་ཟད།གངས་ཅན་བོད་པའི་ཐང་གའི་བཟོ་རྩལ་ཡང་དར་ཞིང་རྒྱས་པའི་རྒྱུར་འགྱུར་ངེས་ལ།དཔེར་ན་ཕྱི་གླིང་གི་བསམ་བློ་པ་བྷག་ལོ་ཧྲན་ཧྲང་གིས་རི་མོའི་འགྲེམས་སྟོན་ཞིག་གི་གྲལ་དུ།ཁོ་རང་གི་འགྲེམས་སྟོན་དུ་ཆབ་རྫ་ཞིག་ལ་རང་ཉིད་ཀྱི་མིང་དེ་བྲིས་ནས་བཤམས་པས།ཀུན་གྱིས་ཐོག་མར་ཡ་མཚན་རུང་།རིམ་བཞིན་དེ་འདྲའི་སྒྱུ་རྩལ་ཡང་ཡོད་ཆོག་པ་ཞིག་རེད་ཅེས་ཁས་ལེན་པར་མ་ཟད།རི་མོ་གསར་པའི་སྒྱུ་རྩལ་གྱི་ཞིང་ཁམས་དེའི་སྒོ་འབྱེད་པའི་ལྡེ་མིག་ཏུ་གྱུར་སོང་བ་ལྟ་བུ་རེད།
　　སྣང་གསར་ཐང་གའི་ལམ་སྲོལ་གསར་གཏོད་མཛད་པོ་ལྟག་ཨོ་རྒྱན་ཆོས་འཕེལ་ལ་ཆ་བཞག་ན།མཁས་གྲུབ་སྐྱེས་ཆེན་དམ་པ་མང་པོ་ཟམ་མ་ཆད་པར་བྱོན་པའི་ཁམས་ཀྱི་ལི་ཐང་ཡུལ་དུ་སྐུ་འཁྲུངས་ཤིང་།སྐུ་ན་ཆུང་ངུའི་དུས་ནས་བོད་རྒྱ་གཉིས་ཀྱི་ཡི་གེའི་འབྲི་ཀློག་ལ་སྦྱངས་པ་བྱས།དགུང་ལོ་བཅུ་གསུམ་སྟེང་ལི་ཐང་དགོན་ཆེན་དུ་བཤེས་གཉེན་བཀའ་དྲིན་ཅན་རྣམ་པའི་ཞབས་པད་ལ་རེག་སྟེ་ནང་ཆོས་སྤྱི་དང་ཐུན་མོང་གི་རིག་གནས་ལ་གསན་སྦྱོང་ཚུལ་བཞིན་བྱས།དགུང་ལོ་ཉི་ཤུའི་སྟེང་དུ་དབུས་ཀྱི་གདན་ས་ཁྱད་པར་ཅན་འབྲོག་རི་བོ་དགེ་ལྡན་དགོན་དུ་ཕེབས་ནས་མུ་མཐུད་དེ་ནང་ཆོས་བཀའ་པོད་ལྔ་དང་རིག་པའི་གཞུང་ལུགས་ཁག་ལ་ཅི་འཇོན་གྱིས་འབད་བརྩོན་གནང་།རིམ་པར་བོད་ཀྱི་ཡུལ་ལུང་མང་ཤོས་སུ་ཕེབས་ནས་ཧི་མ་ལ་ཡའི་རིག་གཞུང་གི་ཕྱི་ནང་གསང་གསུམ་ལ་དམིགས་པའི་ཞིབ་འཇུག་དང་སློབ་སྦྱོང་གནང་།
ཤེས་རིག་གི་འབྱུང་ཁུངས་གཞི་རྟེན་རི་ཆུ་ཀླུང་གསུམ།གངས་རི་དཀར་པོ།ས་གཞི་ནག་པོ།རྒྱ་མཚོའི་རླབས་སྒྲ་སོགས་ཁོར་ཡུག་རྒྱ་ཆེ་ས།གཏིང་ཟབ་སའི་རིག་གནས་ལ་ཆ་རྒྱུས་བྱུང་ཞིང་།རྒྱ་བོད་དབྱིན་གསུམ་གྱི་སྐད་ཡིག་ཤེས་པར་མ་ཟད་ཁྱད་པར་བོད་ཀྱི་ཤེས་རིག་གི་གཞི་དང་རྐང་བཟང་བ།དེ་ལས་ཀྱང་ཆུང་ནས་རི་མོའི་སྒྱུ་རྩལ་ལ་མོས་པ་ཆེ་བར་མ་ཟད།བོད་ཀྱི་ཐང་ག་འབྲི་ཤེས་ཤིང་།ཕྱི་གླིང་པ་དང་།རྒྱ་ནག་པའི་རི་མོ་ལ་ཡང་གང་འཚམས་ཀྱིས་ཆ་རྒྱུས་མངའ་བ།ལྷན་སྐྱེས་ཀྱི་ཤེས་རིག་དང་།
སྦྱང་སྟོབས་ཀྱི་ཤེས་རིག་གིས་སྒོ་ཀུན་ནས་ཕྱུག་པས་རྟོགས་རླབས་ཀྱང་ཁྱད་པར་ཅན་ཡོད་ནི།ཁྱད་པར་དུ་སྒྱུ་རྩལ་ལ་དུང་ཞེན་ཆེ་བ།སྒྱུ་རྩལ་གྱི་བསམ་བློ་ཕུན་སུམ་ཚོགས་པ།སྒྱུ་རྩལ་ལ་ལྟ་བའི་བློ་མིག་ཡངས་པ་སོགས་སྒྱུ་རྩལ་གྱི་སྐུ།སྒྱུ་རྩལ་གྱི་གསུང་།སྒྱུ་རྩལ་གྱི་ཐུགས་དང་ལྡན་པ་ཞིག་ཡིན་ལ།ད་ལམ་སྣང་གསར་ཐང་ག་རི་མོ་འདི་ཉིད་ཀྱང་ཁོང་གི་ནང་སྒྱུ་རྩལ་གྱི་ཞིང་ཁམས་ནས་སྣེ་ཟུར་ཞིག་མི་ཡི་ཡུལ་དུ་གསར་དུ་དགའ་སྟོན་འགྱེད་པ་ལགས་ན།སྒྱུ་རྩལ་འདིས་སྒྱུ་རྩལ་གསར་པ་གང་མང་མང་ཞིག་དབྱར་གྱི་མཚོ་མོ་བརྡོལ་བ་བཞིན་འཕེལ་རྒྱས་འོང་རྒྱུ་དང་།ཁ་བ་གངས་ཅན་པའི་སྒྱུ་རྩལ་བློ་གྲོས་ཀྱི་སྒོ་མོ་ཡངས་པོར་ཕྱེ་སྟེ།བློ་གྲོས་ལ་བཀག་རྒྱ་མེད་པར་རྩོམ་རྩལ་ཕུན་སུམ་ཚོགས་པའི་འཆར་སྣང་དེ་ཕབ་འབྲི་བྱས་ཏེ།འཛམ་གླིང་ཤེས་རིག་གི་གླིང་ག་ན་བོད་པ་ཚང་གི་སྒྱུ་རྩལ་གྱི་རིག་པའི་རྣམ་གྲངས་མཐའ་ཡས་པ་ཞིག་མཐོང་ཐུབ་པ་དང་།འཛམ་གླིང་སྒྱུ་རྩལ་གྱི་བང་མཛོད་ནང་དུ་བོད་ཀྱི་ཤེས་རིག་གི་རྒྱུ་ནོར་ཡང་གང་མང་ཞིག་བསོག་ཐུབ་རྒྱུའི་རེ་བ་སྙིང་ལ་བཅངས་ཡོད།ད་རེས་ཀྱི་སྣང་གསར་ཐང་ག་འདི་ལ་འབྲི་བ་པོ་རང་ཉིད་ཀྱི་ཚོར་སྣང་གི་གསལ་བཤད་མ་བྱས་ན་ཡང་།
གང་ཟག་སོ་སོའི་ཅི་སྣང་གི་ཚོར་བ་རེ་མྱོང་དགོས་པ་ལས།འབྲི་བ་པོའི་ཚོར་སྣང་དེས་ཕ་རོལ་པོའི་བློ་ལ་སྒྱུར་བཀོད་ཐེབས་མི་རུང་ཞིང་།གང་ཟག་སོ་སོའི་སྣང་ཚུལ་གྱི་ཚོར་བའི་རྟོགས་རླབས་རེ་ཡོད་དགོས་པ་ནི་སྒྱུ་རྩལ་འདིའི་རེ་བ་ཉག་གཅིག་དེ་ཡིན་ལགས།